港交所（388）買起倫敦金屬交易所（LME）後，噚日第四年舉行LME亞洲年會，跟往年一樣，日頭喺會展舉行研討會，晚上有black tie dinner，今年晚宴主題竟然係CY最鍾意嘅一帶一路!
雖然話LME亞洲年會越來越墟冚，噚晚晚宴筵開134席，比舊年多5席，共有1,700人參加，相對佢哋第一年搞只得800人，多一倍，但老實講，華華對今年晚宴有啲失望，事關每年晚宴嘅佈置與表演都切合主題，好似舊年以法國紅磨坊做主題，就有靚女跳肯肯舞，現場衣香鬢影。

新疆舞加Jazz串連一帶一路

噚晚以一帶一路為題，台上主要有個一帶一路地圖做佈景咁大把，表演節目包括新疆舞蹈、band sound加爵士樂，呢堆表演究竟係想點樣串連一帶一路嘅國家呢？唔通港交所同廣大香港市民一樣，都唔多清楚一帶一路究竟想點、關香港人乜事?
港交所行政總裁李小加仲妙，佢話佢都係噚晚先至知道晚宴嘅主題係一帶一路，真係信不信由你。雖然呢晚氣氛有啲九唔搭八，但係財爺曾俊華就畀足面，由頭到尾坐足兩粒鐘先走人，大概都係畀面一帶一路喇。佢一出現，又吸引好多賓客走埋去認識一下兼影相「集郵」，財爺果然有魅力。

李華華
mailto:[email protected]