朱孝天同林熙蕾拍拖5年多，去年分手，女方上月底火速嫁成衣商人楊晨，愛人結婚了，新郎冇佢份嘅朱孝天雖然酸溜送祝福，但佢都唔蝕底，上周四被發現冧掂台灣已故總統蔣經國孫女、台灣立法委員蔣孝嚴二女蔣蕙筠，二人喺台北撐枱腳食麪，之後朱孝天仲做柴可夫送佢離開。

「想幹嘛就幹」

現年32歲嘅朱孝天無懼姊弟戀，搭上年長兩歲嘅熟女蔣蕙筠；蔣蕙筠除咗屋企有政治背景，佢仲係中天電視節目部總監，07年仲被爆同製作人江吉雄個仔江辰鴻結婚，換句話講朱孝天變咗第三者。
朱孝天同蔣蕙筠食麪時講唔停，蔣蕙筠只間中答幾句。朱孝天早前拍攝台劇《記得我們有約》時同蔣認識。佢噚日出席台灣活動時回應緋聞，佢話：「我因為要退到幕後才找她聊聊，真的很對不起人家。」
有指朱孝天被林熙蕾狠撇後消瘦，佢死撐話：「想幹嘛就幹嘛，不需要交代行蹤，想跟誰吃飯就去。」蔣蕙筠日前回應：「我們在聊對戲的看法，他一直笑嘻嘻，看來心情滿好，說實在我們並不算熟。」