當年今日

新舊精英 - 左丁山

蘋果日報 2002/01/04 00:00


賓架L與老友經紀V召飲午茶,無所不談。呢兩位仁兄都係香港大學六十年代中期嘅畢業生,用流行術語講,就係「舊精英」。
問佢兩位是否豪門子弟,賓架L話:「唓,替特首寫演講詞嗰位仁兄,肯定唔係港大畢業生。當時啲有錢仔女,多數已經去晒英國、美國讀書,譬如話李國寶啲眾多堂兄弟,有邊個唔係去咗英國、美國呀,𠵱家班大人物馮氏兄弟、郭氏兄弟、羅氏兄弟、唐氏、田氏,董家、包家啲子女女婿,有邊個讀港大呀?我哋啲同學多數家境麻麻,靠考試成績入港大,有鬼家底咩!」
經紀V話:「我哋的確係精英嚟㗎,有兩個特點:一個就係經常走堂,第二個就係兼職多多,補習啦,到附近嘅威記教書啦;之不過一樣考試及格,畢業全無困難。點解要兼職呢?一來就係搵錢交學費,二來就係搵錢追女仔!」大學生走堂搵兼職,並非今日陳校長嘅大發現,陳校長做大學生之時,咪又係一樣。經紀V同賓架L數咗唔少同學,今日赫赫有名,都係冇時間上堂之輩!唔上堂都咁巴閉,可見當日大學生,確係讀書精英。
問番賓架L、經紀V兩位舊精英:「你兩位啲仔女有冇入港大呀?」哦,全部喺波士頓讀著名私校之後入美國大學。佢兩位都話:「培養佢哋做『新精英』吖嘛!」
老竇賺錢仔享福,佢兩位讀書時兼職搵學費,佢哋啲仔女就課餘去打高爾夫,而打得好,當然係新精英之必備技能!