今季日本新劇《不愉快的果實》已喺上星期五晚首播，由於故事翻拍自同名情慾小說，多年前先後搬上銀幕同拍成日劇都掀起話題，今次再被翻拍都備受注目，事關女主角栗山千明唔止變臉演出，仲一改戲路轉行性感，同人氣艷星橋本愛實奉旨鬥剝。

呢套劇集安排夜間11點15分播出，放喺深夜時份自然尺度更大，栗山千明於劇中扮演出軌妻子，稻垣吾郎扮演佢嘅強迫症老公，栗山同舊情人成宮寬貴翻撻兼上床，第一集已有成宮同栗山嘅床戰戲份，栗山仲有背面裸露鏡頭，而橋本愛實仲激，一場浴室激情戲都十分出位。

據日本公佈嘅收視成績，《不愉快的果實》首集錄得8.2%收視，以深夜時段嚟講都算相當不俗，仲成為同時段嘅收視冠軍節目。