37歲鍾欣潼（阿嬌）同台灣老公「醫界王陽明」賴弘國（Michael）今晚喺九龍一間酒店擺酒，筵開38圍。兩人今年喺美國已經搞咗次pre-wedding party，之後仲有一段Michael求婚片段喺網上流傳。而阿嬌經理人霍汶希（Mani）亦證實，阿嬌同Michael已經有生育計劃，並雪卵做保險。（新聞連結： http://bit.ly/2T2Bez1 ）

喺婚禮上，兩人成長、相識嘅片段當然唔少得。呢條片由兩人小時候講起，不約而同都有喺波波池遊樂嘅兒童照相，片入面提到：「雖然我們成長的地方不一樣。出生地點不一樣，但仍能夠走在一起是一種緣份。」之後條片就已經跳到去兩人熱戀時期，先有阿嬌同老公喺沙灘上互相依傍同咀嘴相，又有兩人一黑一白裝束攬到實嘅相，Michael又會去探阿嬌班。最有意思嘅係一張兩人玩apps變老人家嘅合照，相信係寓意兩人白頭到老！

阿嬌同Michael之前影咗一輯水底婚照，今日唔係好見到，原來擺咗好多喺段片入面！當中有兩人喺水入面浮起面對面，阿嬌又坐喺水底嘅大石上面影相。另外，片段入面有兩人去旅行時玩降傘，之後又出咗段好窩心嘅文字：「因為擔心，就算有懼高症，也願意為她克服四千公尺的高空，因為深愛、所以…」所以？所以咪求婚囉。

求婚當日係阿嬌生日會，超蓮都有出席，Michael喺魔術師幫助下拎住玫瑰花出場，話要表演魔術，Michael話：「這是一個比較浪漫的魔術，如果今天你遇到一個生命中對的人，這朵花會打開。」之後佢吹咗一口氣，朵玫瑰花就打開咗，入面收埋咗求婚戒指。Michael情深望住阿嬌話：「雖然我們在一起的時間沒有很長，但是我真的很開心可以認識你。你是我認識過覺得最美麗最善良最勇敢，然後也是我覺得最有趣的人。我知道其實你很懶，那我希望你可以一直懶下去，因為我希望我會一直在旁邊照顧你。」

Michael怕自己唔記得要講咩，仲將兩人合照整咗本書，話寫晒想對阿嬌講嘅說話。然後Michael拎起戒指，跪地求婚，阿嬌開心到講唔到嘢，只係點頭同埋伸出手指俾Michael幫佢戴上。

精選娛聞，喺晒《娛果》
http://fb.com/appledailyent