環球金融海嘯下,大家日日都講緊裁員、減薪,但其實唔係人人都要面對呢啲衝擊,喺東泰證券做咗9年嘅財經名嘴鄧聲興,今日就正式過檔泓福資產管理(RedfordAssetManagement),做執董兼研究部主管,薪金加幅仲有番咁上下,認真係逆市奇葩。
鄧聲興加入東泰之初,只係研究部經理,做吓做吓,升到研究部董事,佢青靚白淨,經常上電視、電台講股,吸引咗大班女粉絲。
佢同華華講,喺東泰做咗咁耐,點會冇感情,但自己就快40歲,都係時候有啲轉變。咁啱有個朋友介紹泓福個老細畀佢識,大家年紀相若,一拍即合,加上待遇優厚,就咁決定過塘。