【出走米蘭】謝安琪放低仔女首踏時裝騷 陳凱琳冇勇氣行天橋
蘋果日報 2019/09/23 13:35
謝安琪米蘭陳凱琳時裝騷
謝安琪和陳凱琳出席米蘭時裝騷。
近日意大利米蘭正舉行時裝周，不少圈中人都有到當地朝聖，好像謝安琪（Kay）和陳凱琳（Grace），兩位媽媽暫時放下仔女，飛往當地出席時裝界盛會。正忙於準備下月開演唱會的謝安琪，昨晚與陳凱琳、郭晶晶等出席米蘭舉行的運動品牌活動，Grace穿上露腰裝，不失性感，而木村拓哉女兒木村光希有份行貓步。
首次參與國際時裝周活動的Kay，笑言終於等到仔仔長大，有機會出國，她說︰「因為之前小朋友仲係細，盡量安排喺香港工作，今年終於有機會，所以真係好開心！其實呢幾日我都係拍攝，未有時間去玩，但周圍地方都好靚，真係好享受。難得我哋可以忙裏偷閒，成crew人一齊食餐好嘅。」
演唱會舉行在即， Kay此行是否有助減壓？她說︰「之前我一直都忙緊演唱會，出發前以為呢幾日會好忙，可能因為風景太靚，我和同事都可以放鬆心情。演唱會後都想同家人再來一次，因為附近好多地方都好寧靜，好適合我哋全家。」
至於第二次來米蘭時裝周的Grace，笑指自己有足夠經驗，好好享受這場騷：「因為上年咩都唔知，以為睇騷要有咩儀態之類，今年我一早裝備自己，可以享受場騷。」問到有冇時間去玩？她說：「頭兩日大會冇嘢安排畀我哋，所以同經理人去吃喝玩樂，諗起都覺得自己過份。」
雖然Grace好期待這次工作，但她婉拒成為天橋上的model：「我諗我冇呢個勇氣行騷啦，我覺得model行騷時，要保持好型嘅狀態唔准笑，加上有好多人望住都幾尷尬，我都係去拍戲。」喜歡睇騷，是否自己都好貪靚？她說：「我哋成家人都唔係好貪靚，只不過係工作需要先扮靚。」
兩位媽咪暫時放下仔女，來到米蘭。
Grace表示沒勇氣做model行騷。
Kay首次出席時裝騷感興奮。
郭晶晶亦有出席。
木村光希再次當上model行騷。