《使徒行者2》今日播出第一集，今次大台好大製作，去泰國取景，仲拍出咗泰國最出名嘅事，就係塞車、香港人同廣東話喇。可能大家會問，塞車好正常，但點解會有香港人同廣東話呢？

因為喺成個泰國取景，都不停咁見到香港人，好似一班臥底連詩雅、洪永城、古明華、何雁詩、楊潮凱五個臥底都係香港，仲要去埋泰國埋罪犯身，係囉，點解冇人覺得有古怪？

之後就係廣東話，《使徒行者2》話晒大家聽，去泰國旅行唔使怕唔識泰文，因為個個人都識廣東話！好似住喺唐人街嘅大佬黃德斌嘅接待員呢一場戲咁，首先係連詩雅去到見到接待員，就用廣東話同佢溝通，之後接待員打畀洪永城扮嘅維修公司，洪永城第一句先講泰文，之後又講廣東話，而三哥去到扮維修員，又係講廣東話……

不過呢，呢五位喺泰國係咁講廣東話嘅臥底，第一集就已經死咗，劇情又推進到去講三哥嘅內心戲喇，相信泰國嘅不合理劇情已經完咗，但之後仲有咩離譜劇情呢？真係想像唔到。