前新聞主播周嘉儀（Venus）今晚喺九龍灣德福商場出席Kiehl's護膚品牌活動，該品牌屬Lancôme母公司L'Oreal旗下品牌，對於何韻詩被品牌劃清界線，Venus小心回應:「冇留意。」對於藝人涉及政治是否直接影響工作，Venus話:「都冇咩回應。」

現場佢仲同大家分享護膚心得，Venus話:「我注重落妝，揀啲好嘅護膚品，注意飲食，多食水果。」Venus話過往做主播嘅化妝以清淡為主，冇特別指引，佢話平時都係習慣淡妝。Venuso依家忙於寫專欄，又要為其金融公司錄主持節目，佢話:「編輯、剪接、拍攝，一腳踢。」對於會唔會寫書分享護膚心得，Venus話寫書工作太繁重，只能夠抽時間喺網上平台作貼士分享。