at17今日去到《蘋果》facebook，同大家做live，答下問題唱吓歌，喺唱完《The Best is Yet to Come》之後有網民話睇到盧凱彤嘅facebook近況，關心下佢O依家點，盧凱彤就話：「我嘅躁鬱症情況係穩定嘅，係好好嘅，我想話畀大家知，躁鬱症係一個病，係一個長期要食藥嘅病，好想話畀社會知，呢個係一個大家要去關心嘅病，只係keep住有睇醫生，同埋有朋友嘅關心，呢個係一個大家一齊去面對嘅病，唔可以話每一日都好開心，每一日都有要面對嘅困難，好似人生一樣，有起有跌，我嘅解決方法係身邊有人愛我，同埋用藥物，有好多facebook嘅留言話佢自己有病，但唔想食藥，但我想話畀佢哋知，其實食藥係唔使怕，正如你有心臟病、糖尿病一樣，都要係長期食藥，唔使驚，同埋要有好朋友喺身邊，咁又有咩好怕呢？」

講到呢度，二汶都話有嘢想分享，佢話：「我覺得好多人都會好擔心，但我作為身邊嘅，擔心係好負能量，同埋冇乜建設性，成日都問佢食咗嘢未咁。」盧凱彤自己都話：「身邊人可以做嘅嘢，你唔使話畀佢知我好擔心你，或者同佢講身邊嘅人好幸福，千祈唔好講呢啲，因為有病嘅人其實佢本身都知，呢個係大腦分泌不足，只需要有人喺身邊就好好，同埋藥物嘅幫助係好好，因為呢個係大腦分泌狀況，食藥係可以平衡番個分泌。」

最後一條問題就係有網民問佢哋有冇互相鍾意過對方，佢就話：「我哋一直都係明戀對方，我哋經過深思熟慮之後，覺得愛情對我哋嚟講係一個好膚淺嘅框架，同埋都已經結咗婚。」

Eman Lam's credit:
Make up: micky choy@such a good...
Hair: Derrick Ng@M R K Duty

Ellen Loo's credit:
Make up: Vanessa Wong
Hair: Cyrus Sit @Salon Amarone

Wardrobes: Sport b.
場地：All-in Burger & Bar