【新增圖片】

成日有人話禮拜六跑馬例爆冷，今日（11日）沙田日賽就證明俾你睇世事無絕對，由頭場「和諧大使」跑第二開始，直至第八場由「喜悅繽紛」勝出，暫時八匹大熱門共取六冠一亞，僅第五場「良才」唔入三甲。

第八場二班田草1200米賽事，一對神級騎練雷神莫雷拉同蔡約翰合作「喜悅繽紛」，此駒上次跑三班1400米連捷唔到，今勻回師本身贏得最多的1200米，兼且升班首戰二班賽，結果負磅大減兼路程最合下，沿途前置，以無敵姿態大熱建功贏1.5馬位，順利完成季內四冠偉業，亦成為蔡約翰麾下今季第一匹四捷馬，單Win及組合獨贏A1分別派24.5及19元。

雷神連同第二、三場贏沈集成馬房「華麗再現」及文家良馬房「笑春風」，全日暫以三匹大熱門中三元，並於騎師王領先潘頓八分帶入第九場，而蔡約翰連續贏到第五個賽日，亦保持雞年未斷纜。

第八場二至四名順序由「活力小駒」、「勝利導航」及「金滿載」順序瓜分，四重彩派二萬蚊鬆啲。