新一屆人大選舉本月4號截止報名，八方聽聞人大選舉秘書處最快本周三公佈正式候選人名單，而被取消資格DQ嘅人，唔只冇簽擁護憲法聲明嘅公民黨立法會議員郭家麒，據知7名報名參選嘅鳩嗚團成員、去年參選立法會曾被DQ嘅香港民主進步黨成員楊繼昌甚至前政協委員劉夢熊，預料同時被OUT，民主派中只有高教界王凱峰過到關，最終參選人數或只近48個，少過上屆52人！

查實激進民主派喺小小小圈子中出唔到閘，大家都明白，但尖啤明明都係建制派，何解又冇得去陪跑？表面睇嚟，似乎同佢入獄18個月留有案底有關，據聞人大嗰邊想同特區立法會及區議會選舉睇齊，唔畀入獄三個月或以上人士參選喎（唔知點解其他防賄等選舉規範又唔一併睇齊？），但實際上呢，相信同尖啤多次發表反中言論有關，尤其幾番批評人大8.31決定，試問阿爺又點會寬宏大量開綠燈？

而尖啤被DQ後，民主派喺王凱峯外又少一個選擇，據知都係中央一大考慮，因為人大選舉用全票制，估計喺冇乜人可以揀下，手持逾200票嘅民主派未必為一個人而另外投畀35建制派，變相減底民主派對最尾幾席嘅影響力，盡量減低非41欽點名單上嘅「外人」當選。

查實獲得祝福，亦唔等於可以坐定粒六，據聞獲西環科技部推薦參選嘅機管局工程及科技執行總監關景輝，經常缺席不同組織舉辦嘅人大選舉論壇，外界觀感同評價麻麻，未必能一擊即中。而成為大熱嘅新丁鄺美雲呢，據知落力出席論壇，最初更以播片取代介紹自己，成為佳話，據聞近期對答已經流暢好多，相信有下過苦功喎！