余文樂今日宣佈升呢做人夫，而「樂嫂」王棠云嘅背景喺佢哋去年公開拍拖時亦都隨即公開，雖然喺娛樂圈未有咩代表作，不過原來身家顯赫，爸爸係全球最大皮帶廠亞美集團總裁王東生，「皮帶千金」呢個身份公諸於世。

不過呢個「千金」身份真係危危乎！喺樂仔公開關係之後幾日，即時被爆爸爸嘅集團積欠廠商20餘億台幣資金，甚至已經執笠。甚至有讀者向台灣《蘋果日報》爆料指見到有4名黑衣人揸車去「樂嫂」經理人公司樓下追債，車上仲掛住「亞美集團王東生，騙人血汗錢出來面對」嘅紅布，當時「樂嫂」經理人公司亦有確認事件。

今年8月，據台灣《蘋果日報》報道，台中市出現5間豪宅被法院強制執行拍賣，拍賣底價逼近2億台幣，而信託人就係亞美集團總裁王東生及徐姓妻子、及集團旗下公司嘅負責人。報道中又表示，業界有消息指亞美集團已查封、等待法院拍賣嘅物件，連同已公告大約有10筆，總市值估計超過6億台幣。

換句說話其實樂嫂已經唔再係「千金小姐」，不過點都好最緊要依家係幸福嘅「樂嫂」吖嘛！