陳豪噚晚喺九龍塘出席戶外品牌派對活動，陳豪同陳茵媺（Aimee）成日都會同三個寶貝去旅行，不過講到camping，陳豪就話：「佢哋仲係好細，每次出動都好似軍隊一樣，如果去camping都幾大鑊，等小朋友再大啲先，仲有大把嘢畀佢哋玩！」

稍後陳豪會一家人飛澳洲過一個溫暖聖誕，之後再趕返香港出席倒數活動：「安排咗好耐，以往年年都要開工。之前返加拿大真係考起Aimee，今次坐8個鐘輕鬆好多，加上有我一齊分擔。」陳豪仲話自己係腍善爸爸，相反媽咪就唔係：「冇辦法，爹哋每次望住小朋友嘅眼神都充滿愛，好容易畀佢哋『攝』咗入去！」

講到五歲大仔校園生活有冇好鍾意嘅女同學？陳豪話：「未！好彩仲未有呢個意識，我哋好注重童真，呢樣嘢係好寶貴，我哋都希望可以盡量保持。男女關係去到小學會接觸，呢啲唔使我哋去教，我哋反而係注重同小朋友嘅精神交流，等待緊佢哋嘅成長，希望扶持佢哋循住健康嘅方向，唔好畀佢哋諗歪，但係又唔可以阻止佢哋吸收同嘗試，真係考起我哋。」

作為爸爸一定擔心女兒將來成長拍拖，陳豪無奈話：「我哋話到事咩？將來世界係屬於佢哋，由佢哋自己做主，成為父母只係可以教好佢哋喺心態上迎接未來挑戰，創自己嘅路。」

精選娛聞，喺晒《娛果》
http://fb.com/appledailyent