娛樂圈近日爆出生仔潮，大肚星媽輪住生，亞視有米「星光幫」冠軍彭遠揚，今年7.1回歸先返鄉下汕尾大搞百萬婚宴，迎娶2013年環球星秀大賽冠軍女友陳奕璉，估唔到佢哋結婚未夠一年就宣佈有喜，據知彭太陳奕璉陀B已7個月，預產期係明年1月。陳奕璉嫁夫隨夫，婚後仲入埋亞視做財經節目《十分財經資訊》主播。

即將做爹哋嘅彭遠揚難掩興奮心情，日前喺微信朋友圈po文：「各位生孩子達人，請問女孩子跟媽媽像，還是爸爸？」彭遠揚大露口風老婆陀B女，其實佢同老婆近日喺微博貼相，個肚都越嚟越大，不過彭太就一啲都唔論盡。

彭遠揚出道已被爆家族喺內地經營醫院，但佢哋就打算喺香港生BB，彭遠揚今日接受《蘋果》電話訪問時話：「喺香港生呀。」咁到時會唔會陪老婆入產房兼剪臍帶？佢話：「會呀，我雖然怕血，見到個心會卜卜跳，但自己骨肉就唔驚啦，我會入去同太太打氣。」佢仲話好期待囡囡出世，佢話：「希望BB似媽咪，咁老婆靚過我嘛。」