36萬闖羅湖美容業 姊妹花靠髮廊免攞牌多熟客

蘋果日報 2002/06/17 00:00


不少過來人都說,要到大陸做生意,最好有熟人幫忙,皆因人生路不熟,若有朋友從旁提點,總好過自己瞎子摸象般亂打亂撞。Carroll和阿Yen這對姊妹花,卻勇於在內地無人無物的情況下,動用36萬資金去打開內地美容市場。令她們決心北上創業的不單止是美容業的前景,還有一則在報紙上登的廣告。

記者:羅蘭 攝影:KennyWong


*籌劃

睇廣告 膽粗粗租舖
到深圳創業只有十多天的阿Yen及姊姊Carroll,可以說是膽粗粗一族,皆因兩個女仔在人生路不熟的情況下,竟然做起過江龍,到深圳深南東路的地王商場大廈開闢門路,進軍美容業。
「其實我同妹妹喺深圳呢度人都唔識多個,可以話係無人無物,全靠喺香港見到一則報紙廣告,話呢度有舖位出租,而且想招攬香港一啲有經驗嘅美容師過去開業,於是妹妹阿Yen就上嚟睇吓乜嘢環境囉。」Carroll口中的舖位,是位於羅湖地王商場一間高級髮型屋內,業主是髮型屋負責人,面積有二百多平方呎,可放四張床外,還有個很大的觀景窗台。
正統培訓 開拓市場
Carroll和阿Yen都不大熟悉深圳的環境和市場,只是她們也有到內地做Facial的經驗,是以感到內地做美容院有發展潛力。
「喺內地一啲大嘅美容院,佢哋好捨得花錢喺器材上,但美容師就缺少培訓,水準亦唔夠香港嘅專業,所以我哋打算嚟深圳開拓市場,專門培訓美容師,教佢哋正統嘅手勢同行業守則,重會教佢哋點樣使用美容儀器,令佢哋可以好專業咁為客人服務。」
個多月調查 地王闊太多
兩姊妹本身都是美容師,在港也有自己的美容院,正因為見到美容業有發展空間,是以近年不斷留意深圳市場,發覺唔少闊太都愛到地王商場消費。
「我做咗個幾月嘅市場調查,發覺呢度最啱我哋嘅發展方向,但可惜商場本身已經有幾間美容院,而且又唔會再考慮批多一個舖位做美容院。咁啱嗰時又見到租舖廣告,於是我咪上嚟同個負責人傾約囉。」
阿Yen話可能人夾人緣,一拍即合,於是以每月?15,000租金租下現時舖位,暫時所吸納的客人,全以髮型屋的熟客為主。
姊妹花教路
1.了解市場需要:因為內地跟香港不同,客人的要求不一樣,尤其是內地人大都愛面子,所以要服侍得特別周到。
2.最好內地識人:因為若然好像她們,在內地人生路不熟,便該找些不需要領牌的舖位。
3.生意手法靈活:要多做宣傳或推廣手法,市場反應最緊要快。


*策略
商舖合作搞優惠
「髮型屋嘅人會推薦熟客嚟我哋呢度做Facial,不過唔係個個都肯做,因為佢哋一早已有相熟嘅美容院,所以要佢哋轉過嚟做Facial都會有一定難度。加上我哋個位置又喺髮型屋入面,所以𠵱家我哋要開始做宣傳,例如喺商場內派傳單,又或同某啲商舖合作,買滿一定金額嘅嘢就可以有某個數額優惠。」雖然客路較窄,但Carroll希望可以港式的專業水準去吸引客人。
免費皮膚測試
「無論佢會唔會幫襯我哋,我哋都會先同客做皮膚測試,向佢哋詳細分析佢哋嘅皮膚狀況,通常第一次佢哋唔會咁快幫襯,但就會諮詢好多問題,第二次就會入嚟睇環境,到第三次佢哋先會畀錢做。如果喺香港,我哋根本唔需要同個客講咁多嘢,但呢度就一定要有耐性。」
比對手平少少
為了要跟其他美容院競爭,Carroll兩姊妹把價錢定得比其他同行低一點點,例如別人做一次普通Facial收費四百蚊,她們就會收二百幾三百蚊,總之不會太便宜,但又比其他對手平。

法式美容 香薰按摩
「我哋除咗做Facial之外,重會有減肥同香薰按摩服務,各項服務收費由?200至?1,000左右,賣點會係用正宗嘅法式手勢去幫客人做美容,所以會跟呢度嘅美容院唔同。
律師意見
廣東啟源律師事務所熊永安律師謂在內地做美容院,需通過綜合治安領導小組審批,才能申請消防、環保等牌照,非常複雜。因此,像這對姊妹花,在髮廊內租地方會較簡單方便,因為髮廊早已申請美容營業執照,加上在商場內營業,連消防及其他環保執照都不用自己申請。
*阻滯

棉花柔順劑比港貴
「我哋計過,如果唔計買機器所用嘅資金,每個月起碼要做?65,000生意,重要維持三個月先可以令收支平衡。因為呢度嘅雜費係爆炸性嘅,我點都估唔到喺呢度買一支柔順劑要?36,比香港貴成十蚊,棉花每磅都貴香港三蚊呀。」

夜歸怕老笠
阿Yen話來到深圳創業,有很多事都不大習慣,好像她每晚回家,都會經常四周察看環境,慎防被人「老笠」。「尤其是去銀行攞錢,我都會望前望後,好驚有人跟蹤我,就算夜晚去買嘢,我都要搵人陪我。

電話安裝一個月
「如果你問我開舖順唔順利,我會話都算順利嘅,除咗裝電話裝咗一個月、送枱送咗一個星期都未到,同送水機時只有水機又無水外,其他嘅都總算無乜大礙。至於員工方面,我哋都算好彩,因為登報紙請番嚟嘅員工都好聽話,而且一教就曉,唔需要費神。」
聯絡我們
面對香港經濟不景,裁員不停,失業率持續上升,香港經濟逐步轉型,人人北望。「北上創業」版訪問一些香港人在內地成功創業的例子,如閣下是其中一分子,又願意將你的經驗跟讀者分享,請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真:27420542。請附聯絡電話。