台灣女星安以軒同澳門德晉集團CEO陳榮煉今晚喺台北文華方酒店舉行婚宴，邀請咗好多賓客出席，包括房祖名、大小S、林依晨、陳妍希、潘瑋柏、任賢齊、邵美琪、洪天明、曹格夫婦、賀軍翔、陶喆夫婦、張耀揚等好友。

房祖名就帶住一朵玫瑰花現身，祖名話佢同安以軒曾合作過一部電影，佢話係代表導演送花比新娘子。而同安以軒合作過《空手道少女組》嘅林依晨，佢就着住白色晚裝到場，佢企喺背景板影相時，就差點被絆倒。

小S同大S兩姊妹就分別帶同老公許雅鈞同汪小菲出席婚宴，小S就着住高叉嘅黑色晚裝到場，現場即時起哄，佢就講笑咁話：「會不會超越新娘太多啊！」講到兩夫婦嘅相處之道，佢建議一對新人要盡早搵到共同興趣。而大S就好感激當年安以軒介紹汪小菲俾佢認識，佢仲話同安以軒曾經為此事而抱頭痛哭，而汪小菲就話佢同安以軒係認識十年嘅好朋友。