當年今日
關於我們

  黃宜弘詐傻收線 - 李八方

蘋果日報 2004/08/06 08:00


中指議員黃宜弘來屆唔使接受選票嘅考驗,佢得到中總支持、喺冇對手情況下循商界(二)功能組別連任。噚日商台《風波裡的茶杯》駁通電話,問「IQ博士」黃宜弘嘅當選感受,主持人以諷刺嘅語氣問,係咪因為佢「實力太強」所以冇挑戰者?IQ博士聽唔出話中有骨,重沾沾自喜咁話,對方應該問第三者,如果問佢自己,當然會答係。
跟住主持人提到佢嘅外號「瞓身議員」同「中指風波」,話有市民批評佢係咪重適合做議員,問題都未問完,IQ博士就搶住答,話一切已經交代晒,舊事唔再重提。
佢唔等主持人有反應,跟手就話佢所在嘅區域電話接收得好差,對方啲問題窒吓窒吓聽唔清。主持忍唔住問佢喺邊區,黃宜弘話喺港島南區,但就堅持聽唔清其他問題,只講咗一句「第二日再傾,拜拜」就收線。一日有功能組別存在,一日就有啲咁樣嘅「尊貴議員」,住港島南區、聽唔清市民嘅問題、只會伸中指同開會瞓覺,都冇人奈得佢何。


傳真︰2623-9278
電郵︰[email protected]