全球資金神經緊張，即使歐盟救市，銀行同業拆息都冇顯著回落，金價同債券市場已率先反映避險情緒，一向以槓桿式併購運作嘅私募基金同樣要避。
物美商業（8277）日前宣佈大幅縮減配股規模60%，股價單日急跌8%。公司原計劃向包括美國私募基金TPG在內嘅策略股東集資16.3億元，但之前承諾A股上市一直只聞樓梯響，基金仲肯「科水」已算仁至義盡。
講開TPG，喺中國叫新橋資本，代表作係5年前成功入股深圳發展銀行，成為第一間外資控股內地商業銀行嘅私募基金。經過多年改造，將醜女大翻身以144億元人民幣作價，嫁畀平安保險（2318），投資收益高達10倍。

美國思維唔啱用

TPG喺95年登陸中國，一直行事低調，近期突然轉軚接受傳媒專訪，話要增加喺內地嘅知名度，希望更易泊到好碼頭。的確，喺入股深發行同聯想集團（992）後，TPG嘅發展步伐唔及其他美資甚至係港資私募基金，百仕通引入中投、成立人民幣私募基金，港資東英金融（1140）亦泊到中投收購海外石油資源，連復星國際（656）都跟凱雷私募拍住上，偏偏管理全球600億美元資產同250億美元現金嘅TPG卻一籌莫展，難怪心急。
聯想前CFO馬雪征07年退休後，過檔TPG幫手打通內地人脈，佢總結TPG經驗，發覺以美式高槓桿「蛇吞象式」收購，或者搵瀕臨破產公司做白武士嘅策略，喺中國行唔通，因為中國根本冇咁多破產企業，大型民企亦唔多願意將資產整體出售。適者生存惟有變陣，唔求做大股東，只做合作夥伴。
TPG知錯能改，承認唔應該用美國思維，幫美國人喺中國掘完金就割禾青走人，而係化身中國人，以海外資產管理經驗替中國人管錢，將來甚至幫中國人攞人仔投資美國。
中國形勢比人強係鐵一般事實，接受唔到就咪嚟搵食。細路仔基金TCI若果一早學識變陣，入鄉隨俗，喺領匯（823）嘅古仔肯定會完全改寫，唔使撞到焦頭爛額。
胡孟青