今年香港小姐選舉，被外界指賽制兒戲，港姐冠軍雷莊𠒇(Juliette)當選惹爭議，今日有周刊指無綫高層余詠珊見每年港姐收視一般，又冇以前咁多贊助商，有提議今屆停辦，不過管理層就否決咗，咁新一屆嘅港姐伍樂怡(Kelly)、何依婷、黃瑋琦、張寶欣及邱晴等就獲安排去藝訓班，暫時未知冠軍雷莊𠒇有冇份入，不過雷莊𠒇之前講過喺香港逗留一年履行合約，就計劃完約後去荷李活發展，似乎志不在大台噃!!!

落選港姐「仙氣李若彤」Kelly早前見過樂易玲，被欽點上藝訓班，睇嚟好大機會，好似陳凱琳、蔡思貝咁，面對大台冇咩當家花旦，被力谷上位做女一，睇怕Kelly讀完半年藝訓班，就會同大台簽長約，有指今次雷莊𠒇贏冠軍，係因為家底好，原來Kelly家底都好有米，Kelly爸爸就係有「胸圍大王」之稱嘅Johnson Ng，而Kelly哥哥伍栢程係開內衣公司，估計每年賺5百萬美金，Kelly係屋企孻女，據知情者向周刊指本來爸爸係唔贊成Kelly去選美，最終都獲家人支持，Kelly同碩士生男友Howard感情都好穩定，二人同居喺九龍區一個屋苑，男友做助理測量師，負責基建工程。

此外，同樣有個富男友嘅仲有雷莊𠒇，佢同牙醫男友Hanmin感情都唔錯，有周刊指雷莊𠒇嘅爸爸雷葆文喺金融海嘯時，身家縮水，賣咗香港嘅物業，不過囡囡雷莊𠒇一直都繼續讀國際學校，雷莊𠒇喺2012年移民加拿大，當時同鍾鎮濤囡囡鍾嘉晴冇成日聯絡，不過今年返香港選港姐，就主動搵嘉晴，由舊同學升呢做好友，嘉晴亦有自己Ig為呢位好友打氣，更因嘉晴嘅關係，成功埋堆，早前一齊出席關之琳生日會，同場有阿Sa、周汶錡、梁家輝等。