安國倫呢晚都算犀利，埋單計數喺全闊A欄贏兩隻大外檔馬起孖，先係第五場12檔「錦繡河山」，再嚟尾場10檔「愛寶駒」，一追一放發揮得淋漓盡致。睇番馬年成績，安國倫兩次起孖都係谷草夜馬，上次2月12號用B跑道作賽，一對頭馬「過關勇將」及「奇勇」分別排12檔及9檔，「過關勇將」後追立功，「奇勇」則前置奠勝，反映出呢位澳洲好手應付谷戰外檔馬真係有一手。與此同時，呢晚榜首騎師潘頓交白卷，而二哥雷神停賽，韋達同安國倫各贏兩W，造成騎師榜Big4排名冇變，韋達仍以五Ｗ領先安國倫排第三。