【本報訊】大埔區校園驗毒計劃具體細節將於下月公佈，教育局署理局長陳維安昨表示，局方聽取各界意見後會再仔細探討計劃細節安排，包括學生應否簽署同意書及警方介入程度等公眾關注議題。他重申警方不會利用驗毒結果檢控學生，家長按現時法例亦有權為子女簽同意書作決定。
陳維安昨出席由坊間團體主辦的抗毒高峯會。他致辭時表示，驗毒計劃自推出以來一直備受各界爭議，但他至今仍堅信整個社會均支持抗毒大方向，「計劃可以話係成個抗毒軍火庫中嘅新武器！」

「今次係親子機會」

對於家長擔心計劃可能激化與子女的矛盾，他以簽成績表為例解釋，「好似學校要求家長喺成績表或者手冊上簽名，學生照做與否唔只係誠信問題，亦係佢哋可唔可以做到自我約束嘅問題。家長一定要喺完全信任同放縱之間攞個平衡，今次計劃反而會係親子之間一個好好嘅交心機會。」
他其後接受訪問稱，驗毒計劃將如期於年底推行，當局下月公佈計劃細節安排，並與大埔區師生詳細解釋計劃，「我哋會努力優化計劃嘅各個細節，例如考慮畀家長同學生同時簽署同意書、各種資源分配同埋警方介入程度等等，我哋亦好高興見到個別地區響應會做校園驗毒，咁表示佢哋都支持抗毒呢個大方向。」