沈卓盈（沈大師）今日喺西寶城出席中秋節活動，佢同拍拖年幾嘅男友Calvin發展穩定，不過沈大師話喺人月兩團圓日子，會好傳統地陪屋企人度過，男友都會出席。沈大師話屋企人會自己聯絡男友，講到咁融入家中，係咪好事近？沈大師好sweet話：「我有講過咩？我哋相處開心。」

之前沈大師同男友被影到出雙入對，問到係咪同居關係？沈大師有所保留：「唔好問呢啲啦，總之屋企人好鍾意佢，家姐搵唔到我都會搵佢，已經skip咗我。同居係私人問題，唔答啦，都係……放過我啦。」係咪要等男友求婚？沈大師話遲啲先公佈，只話有默契、好穩定，仲話兩人拍拖態度都好認真，思想、目標、價值觀一致好重要，讚男友係好男人。

沈大師又指稍後會同「少婦聯盟」（成員仲有陳凱琳、譚凱琪同龔嘉欣）班姊妹一齊去北海道拍攝旅遊特輯，預告到時會大玩踢爆同浸溫泉。