造價逾17億嘅元朗「天價」天橋，因為造價太貴近日突然惹起關注。翻查歷史，呢條天橋緣起原來因為前特首曾蔭權十年前一句話，最初爭議唔係造價而係選址同設計，元朗區議會各黨派議員都支持，但直至政府今年向立法會申請撥款時始知開價達17億，如果政府當初以此天價喺區會推銷，未必過到關噃！
隨住元朗區人口急增，內地自由行令元朗大馬路同附近街道人、貨、篋爭路，煲呔結果喺2008年《施政報告》提出：「在元朗市中心青山公路（元朗段）興建行人天橋系統，覆蓋市內人流暢旺的街道。」路政署喺2009年至2010年為元朗區行人環境改善計劃舉行公眾參與活動，之後到元朗區議會進行諮詢，初步敲定建天橋。

區議員︰倘早知高價 立場或不同

但元朗區議員麥業成向八方稱，路政署一開始話呢條天橋只需2億元，而由於政府喺區議會層面鮮有觸及天橋造價，議員關注都係天橋嘅「落腳點」。
天橋設計亦係爭議點。路政署最初建議流線型設計，有高低落差，左右彎曲，以增加美感，但區議員反對，輾轉天橋嘅設計喺2016年、即係提出後8年先敲定，路政署將天橋拉直，維持540米、闊6米設計，政府則喺今年4月向立法會申請撥款，開價高達17.85億元。麥業成都話係政府向立法會申請撥款時先知道建天橋屬巨額，若一早支持取態立場或有不同。
2008年煲呔一句話，造就天橋嘅開展，無論天橋係2億抑或17億，再次反映香港官僚嘅運作，因為長官一句話直至成事，前後竟然15年，最新預計係，天橋要2023年完工才能畀市民使用。