發展商新樓送蒸餾水，算，乜都唔送，都算，但送條毛畀業主就真係吹脹。《蘋果驗樓》邀請資深驗樓師詹濟南驗收香港興業（480）愉景灣意堤一個540萬元的開放式單位，講到入伙禮物送咖啡機，正在檢查廚櫃底的詹Sir突然回首，然後從櫃底執出一條雞毛後，字正腔圓地說：「送條毛畀你！」廚櫃底大量垃圾，為單位評分先送一隻蛋，然後浴室牆身、大門、廚房窗邊磚……唉！總共3隻蛋、一項不及格，單位65分。詳細驗樓報告分述如下：

單位：愉景灣意堤6座高層戶
實用面積：350方呎
間隔：開放式
成交價：約540萬元

石材（0分）
問題：浴室企缸牆身鋪人造石，石縫一笪二笪黑色的迹，詹Sir寧願是一抹即甩的霉迹，卻是較難擦甩的污迹，可用鋼絲擦或螺絲批挑，聽到都覺煩。石縫掃口手工有幾差？過去曾試紙仔拮得散，現在紙仔攝入如碌卡，最大鑊是貼地直角掃口粉全甩現窿，必定入水。淋浴水龍頭開關邊位無封膠，危險程度絕不下於無封關，前者入水，後者播毒。即使牆身防水層做好，水由石材底四圍走，濕氣入門框令之變黑。
建議：零分重造。

問題：夾在客廳與露台之間揀錯石，摸落刮手查實是天然氣孔，且石材已經病變，出現粉化。揀錯石，比揀錯樓更可怕，樓可以賣，但石材方面，詹Sir指，根據英國標準，這類石材目前狀況符合標準，發展商採購了就無得退貨，其實這些位置鋪瓷磚咪算囉！
建議：雲石膠修補後拋光。

鋪磚（0分）
問題：起眼的地方無出事，不起眼的地方反而有事，因為工人都是從業主角度出發，當眼位加多兩錢肉緊。結果最多磚的露台無空心，而廚房窗邊20塊瓷磚就9塊空心。
建議：鏟起重鋪。有人話外牆瓷磚跌落街令人中頭獎後果不堪設想，但先要磚跌落街，然後有人從樓下經過，然後又要跌個塊磚擊中途人，嗯！機會是有的。

整潔（0分）
問題：廚櫃底除了開頭講的雞毛，還有狀似「神主牌」的木板，以及鎅刀，攻擊性武器呀！
建議：執走佢。

門（4分）
問題：冷縮熱脹，自然定律，詹Sir估計，大門在冬天安裝，現在回暖，門扇微脹，加上防盜扣裝得太貼門扇，結果咔咔嚓嚓刮得多，門扇被刮出約1平方吋的木飾面。動記者Jay想手多搣甩它，詹Sir喝住別刮它。
建議：搣走它就沒有東西來補，如果師傅手勢好，補返會不覺。整個更換不是更好？不。

總結：
詹Sir原本估有70幾分，結果最後65分，包括瓷磚失手，比想像中扣多了分；企缸掃口，令人嘆息。手工差，他認為，此盤所在地山長水遠，手工好的師傅如果市區有工開，也不願意來。樓盤發展商香港興業回覆，已即時與業主聯絡並跟進執修事宜，將盡快完成執修工程。

上述單位在意堤，位於愉景灣，一個坐船去中環約25分鐘的地方，卻感覺不似香港，這正是上述單位業主想要的。30歲Richard在香港出世，英國留學回流香港加入投資銀行，一個圈外人看似好好的行業。Richard表示，在投行工作工時長，朝早返8點，夜晚回家已10時多，想直接瞓落床，「所以買樓都想揀唔喺市區啲單位，自住又好，點都好，離開公司遠少少，周末日可以休息吓，喺個島行吓，chill啲！呢度交通費係貴，但自住對我無乜大影響，想同公司保持返距離，返工放工中間搭船可以睇吓新聞。本身住開馬灣，都鐘意無咁密集，有好大範圍睇吓風景，游吓水咁過一個周末。」

你睇人好，人睇你好，他坦言：「係投行工作好大壓力，而近期係超大壓力！我諗大部份嘅人都係無賺錢或者輸錢，就唔係好開心，我哋要分擔佢哋嘅憤怒和不開心。我諗暫時仲未有裁員及減薪壓力，你見滙豐唔派息，可能歐洲好多銀行都會跟隨，務求減省開支，減薪潮或裁員潮會到下年先發生。（如果殺到埋身？）唔緊要嘅，做第二啲嘢都可以，或者轉公司、轉做其他嘢，暫時呢方面又唔係好大壓力。」

首次買的樓銀碼不算大，首期80多萬元都是靠自己，更其實是，「我阿爸阿媽到而家呢刻為止，都唔知我買咗樓，到你播條片出街，佢哋可能先知。但可能我戴住口罩，佢哋唔知。佢哋有自己嘅計劃，咁我咪自己買囉，我諗唔靠父幹都唔會鬧我啩。當然呢度投資升值潛能無咁大，但防守性都可以接受。（要替你打格嗎？）唔使啦，可能佢哋唔睇《蘋果》，佢哋好藍㗎。」

不過單位就令他不滿意，「好失望！開始諗住好好地入住，估唔到發展商送咁多禮物畀我。開始以為唔使點驗，見都幾用心打造，但估唔到分數出來令我幾失望。自己無試出咁多嘢出嚟，詹Sir一開門出來就發現門面爛咗，之後驗吓驗吓咁多黃色紙。開始估有85分，估唔到最後係咁低分，如果知道咁多問題，可能打個95折可能fair少少。而家當然唔收貨，隨咗送咖啡機、雞毛、神主牌狀木板，希望可以執好啲，同聽到我嘅心聲及不滿意。」

愉景灣，有人稱「DB」，崇洋心態作祟吧，講的人以為好high class，其實位處大嶼山。雖然有陸路交通，但區內嚴禁私家車進出，屋苑官網不難發現自吹自擂的「無污染環保城的稱譽」，區內另有巴士線。車主明明有車，卻要泊於港鐵欣澳站或東涌站，然後轉巴士。想滿足區內揸車癮，惟有哥爾夫球車，全區約500架，買賣都是車連牌照，中原地產李偉寧表示，該車買賣放盤約15個，叫價由195萬至230萬元，視乎車齡，3月份有1宗成交為190萬元。另有放租6個，月租7,500元起，最近成交7,200元。

對外往返中環船費好貴，成人單程46元，就算有居民優惠，每程都33.5元。的士去欣澳站，單程約80元。除兩條巴士線往地鐵，還有一條往機場，經常被人說區內很多空姐及機師。統計處2016年中期人口普查，愉景灣有20,271人，華人佔9,061人，其次是白人，有6,124人，年齡中位數男和女分別44歲及41歲。全區工作人口10,803人，按行業劃分，從事運輸、倉庫、郵政及速遞服務業，此行業包括空中運輸工具、空運業等，有1,195人佔整體11%，女性佔305人。最多人從事雜項社會及個人服務有2,551人，佔整體23.6%，女性佔2,491人，此行業包括家庭傭工等。結論是，不要太多幻想。

記者：陳家雄

影片
採訪：陳家雄、張嘉鎣
編撰、旁白：張嘉鎣
攝影：細釗
剪接、後期：劉果豐
編審：楊智佳