現年28歲嘅韓國男團2PM成員澤演已屆韓國入伍年齡，不過佢未有好似其他男星咁公開自己入伍日期，所以今日突然爆出佢低調入伍嘅消息時，令粉絲相當震驚，至於OCN新劇《救救我》成為其入伍前嘅最後作品。

澤演所屬嘅2PM今日出道9周年，噚晚佢孖住隊友喺V app做直播時都冇透露過會入伍。而澤演所屬嘅JYP事務所表示：「澤演一直想低調入伍，所以唔會特別公開入伍日期及時間，但澤演嘅家人及2PM隊友都會去送別佢。」

據知澤演於今日韓國時間晏晝2點，以現役兵身份到京畿道高陽市嘅白馬部隊新兵教育隊報到，有現場人士影到身穿黑Tee、黑帽嘅澤演笑住現身，不過一名疑似澤演媽咪嘅女士就相當不捨咁攬住澤演。而澤演為咗可以當兵，早已放棄美國國籍，並先後做過兩次手術務求以現役身份入伍，受到外界嘅稱讚。

另外，澤演嘅隊友Jun.K今日亦透過Instagram，上載咗與澤演嘅合照，相中已剃頭嘅澤演做出敬禮嘅動作，Jun.K則留言叫澤演要健康回歸，大晒兄弟情。