【逆權運動】1200萬啟德新樓業主：大愛啲，真係想樓價跌！
蘋果日報 2019/09/06 06:00
驗樓
90後劉生幫屋企經營小生意，去年做「父幹族」以1,200萬元買入會德豐（020）啟德Oasis Kai Tak一個494方呎兩房單位，上月收樓正是警察涉嫌濫用私刑虐打長者新聞滿天飛那天，他憤怒。逆權運動激起友儕間談論移民，他答：「我始終覺得香港先係自己屋企，我想留返喺度。」即使樓價下跌，亦似乎在跌，才25歲的他說：「大愛啲咁講，係想嘅，好多香港人真係負擔唔到香港樓價。」、又謂：「多啲人買樓，多啲人開心囉！」
年紀輕輕的他準備和女友拉埋天窗，成家立室，未婚妻在鏡頭外，他笑到瞇起眼說：「啱就去啦，果斷啲，想要就要。」雙方家長已舉腳贊成，並資助一對戀人先買樓後結婚，「香港樓市只升唔跌，有得買最好買咗先」。買樓買地區，人人都知啟德是新發展區，潛力較高，他記得：「當時屋企人一人一句，我哋支持父母決定，揀啟德樓都係父母嘅意願。」抽過啟德一號、龍譽，「龍譽抽唔到，嗰時幾激烈，排晒隊，啲人搶住買，可惜最後抽唔到。見到咁多人搶，你講放心可能都有啲，好多香港人都好似我咁，急住想快啲買樓。咁多人搶，個市唔可以話穩定，但有信心會繼續升，始終需求大。羊群心理？相信好多人都有，最主要自己覺得有需要就去啦，唔使理其他人。」後來抽中Oasis Kai Tak，「我屋企人反應大，好興奮，知道抽中成個跳起。好難㗎嘛，之前已經失敗咗2次，中咗嗰下好開心！」
當時預算樓價1,000萬元，最後買了1,200萬元的兩房單位，呎價約2.4萬元，借發展商二按，支付2成首期連雜費約300萬元，家人資助200多萬元，自己多年來的幾十萬元積蓄已盡地一煲，「我個人覺得好貴，但都會堅持買，一定要上咗車先。其實我真係好幸福，25歲就擁有1,200萬嘅樓，自己知道好過好多人。一定要多謝屋企人畀首期。」
目前一按及二按月供約4.7萬元，他落手落腳幫屋企打理小生意，自信供得掂。不過他說：「過去幾個月，生意真係少咗，粗糙估計少咗3、4成，經濟壓力多咗，但香港地少人多。唔好講樓價，起碼自己有得住。啟德區會升嘅，樓價跌唔多唔少有啲擔心，講到尾呢層樓唔係炒，唔係放租，係自己屋企。升幾多，跌幾多，隨緣啦，都係想有自己屋企啫。」
他稱：「擔心咁多就咩都做唔到。果斷啲好，要做就做咗先。睇返社會狀況，（逆權運動）唔會咁快完。自己屋企都做開儲蓄，有筆錢，支付到呢個單位嘅。將來經濟點，唔敢講，不過希望會好轉。而家社會活動嘅原意，我唔多講。但令樓價下跌呢，其實大愛啲咁講，我係想嘅，好多香港人真係負擔唔到香港樓價。如果佢哋真係做到（樓價跌）嘅話，我唔會批評佢哋呢啲行為。樓價跌咗，的確對香港土生土長嘅人係有好處，而呢樣我相信好多人係好開心見到咁嘅事情發生。自私啲咁講，自己層樓個價跌，一定唔開心，但我接受到，接受到個價可以跌。」他續稱：「多啲人買樓，多啲人開心囉！」
然而樓價跌，經濟差，可能搵唔到食？他深信：「樓價跌都會有人買樓。」他續說：「作為一個有正常道德倫理心嘅香港人，見到啲咁嘅事情發生，的確係非常之氣憤。你話，睇香港嘅前景，老實講，暫時好唔明朗，唔樂觀。有朋友問我會唔會移民？我始終覺得香港先係自己屋企，我想留返喺度。」
記者：陳家雄
