組合Soler成員細孖Dino再為人父，混血細仔Orlando已於上周三（23號）出世了，是個重9.1磅的巨B，肥嘟嘟、圓碌碌、手瓜起𦟌萌到爆！連同現已2歲多的長子Damiano，Dino前日可以一家四口人月團圓，幸福滿瀉！
昨日Dino接受本報電話訪問，講到細仔的出世日期時，他的興奮心情仍未平復，他說：「喺呢個……哈哈哈，嗰日幾多號呢？係，9月23，因為我腦裏面好多日子。」Dino表示太太黃麗施是開刀生B，但他沒親手剪臍帶：「好快做晒手術，醫生冇叫我行埋去剪臍帶，亦冇拍片，因為唔畀帶入產房。」

幫手換尿片

Dino又透露BB出世情況好順利，他說：「9.1磅，好重呀。」問兩夫婦有否開心到喊？他說：「好感動，覺得好安心，始終開刀唔係輕易，佢係第二個仔，感覺係歡迎佢加入家庭，英文名叫Orlando，意思係偉大嘅大地，中文名叫夏恩澤。」BB樣子似誰？Dino笑說：「似親戚囉，哈哈哈！因為基因，呢樣喺大仔出世時確實咗，大仔出世似公公爺爺婆婆嫲嫲阿伯阿叔，之後慢慢變，BB（細仔）個樣未定，仲係腫腫哋，暫時似我同太太各一半，眉毛就似我。」
問大仔有否呷醋？Dino說：「冇吖，不停錫好開心。」Dino指BB和太太已出院，太太康復得頗快，自己有幫手換尿片，他說：「我做家務，日日洗地洗廁所，又要湊大仔返學同照顧狗。」被問到狗狗是否好歡迎新主人？他說：「會，第一日已經走埋嚟，知道係BB，好體貼感覺。」對於有些主人生BB後不養狗，Dino堅決說：「我哋覺得冇問題，大仔好鍾意狗。」
採訪：皓騫