今日年初三赤口不宜拜年,大家放假喺屋企,最好就係食吓糕上吓網,或者去拜個車公轉個好運啦,講開又講,暫時都仲未有麒麟被捕嘅。《蘋果》娛樂組仝人喺到祝大家一團和氣,喜上加喜啦!
大劉劉鑾雄今午繼續喺佢飯堂福臨門食晏,佢同埋甘比仲有一對仔女到場,大劉就全身深藍色,雖然要篤住拐杖,不過好似冇噚日行得咁辛苦喇。甘比囡囡劉秀樺就自己一個跳落車,媽咪就以紅襯黑,囝囝JosephJr.就由婆婆抱住落車。幾分鐘之後,大劉媽咪劉老太就同兩個囡囡一齊到場。
食咗大概一個鐘,劉氏一家就一齊走喇,甘比拖住劉秀樺一馬當先上車,劉老太就由兩個女扶住出嚟,同時JosephJr.就由婆婆抱住上車。大劉就殿後自己慢慢行。
上咗車之後,坐喺Daddy旁邊嘅秀樺就玩電話,媽咪甘比就抱住囝囝坐後排。