杜汶澤自導自演嘅《空手道》上年上映，獲提名電影參加多個電影展，電影今年3月入圍咗13屆大阪亞洲電影節「競賽單元」部份，而阿澤仲威水，獲頒贈「亞洲之星大獎」，田蕊妮就陪老公飛到當地領獎。同晚阿澤爆粗喺ig留言，話老婆錯手跌咗個獎落地，個獎一分為二，嚇到阿田即場爆喊，連講三次對唔住道歉。（新聞連結： https://bit.ly/2IA7Mw7 ）

隔咗三個月，杜汶澤今日46歲生日收到老婆嘅生日禮物，竟然就係呢個「亞洲之星大獎」！雖然唔係完好無缺，條裂痕仲好顯眼，不過已經二合為一。阿田話：「跌爛咗，再整番，仲當埋生日禮物咁送畀你，係咪好開心，好驚喜呢！祝你生日快樂！」阿田應該係將個獎鑲好，再送俾老公，而阿澤就嘟嘴錫咗個獎一啖。

壽旦公阿澤都有貼相，包括一張阿田再頒番呢個「亞洲明星大獎」俾佢，同佢嘅獎項櫃嘅相。佢話：「今日生日，我老婆畀咗個獎我，但係個樣，明明係之前響日本俾人打爛咗嗰個大阪電影節亞洲之星獎嚟喎！點解咁奇怪呢？你哋又記唔記得邊個打爛嘅呢？」

精選娛聞，喺晒《娛果》
http://fb.com/appledailyent