兩鐵合併草案，立法會拗咗三日先通過，民建聯粒聲唔出，咁忍口係因為民主黨提出多個修訂佢哋唔可以開口反對，否則年底區議會選舉時實畀民主黨唱佢哋出賣市民，所以一於悶聲發大財，少講為妙。主體條例通過後，搭兩鐵講粗口要坐監等附屬法例，下個月先表決，民主黨鄭家富希望官員接納佢哋提出「兩害取其輕」原則，即係以兩鐵附例中較輕罰則為標準，否則又有排拗。
呢條草案辯論三日先通過，原本噚日向財委會申請重組三司十二局、拆卸皇后碼頭撥款押後到下星期二先投票，由於兩筆撥款都好有爭議性，傾唔掂要下星期五再處理，政府就話就算財委會未通過撥款，下星期三都會如期提出重組三司十二局決議案，有保皇黨支持，打橫行都得啦。