勤+緣（2366）現價PE得5字頭單位數，買龐大嘅內銷及內需概念，勤+緣抵搞。勤+緣主打祖國電視節目製作及媒體廣告業務。雖則祖國上年受天災影響，加埋下半年環球金融海嘯，但集團08年度（9月底止）純利仍然錄到56%增長，上到2.17億銀，絕對有交代。
仲要咁睇，勤+緣家陣喺祖國成功營運7家電視頻道嘅廣告獨家代理業務，已經有優勢。阿爺呢期谷內需政策，加埋海內外企業又覬覦內銷市場呢塊肥肉，短期睇，應該冇問題。又隨住祖國內需購買力逐步釋放，勤+緣中長線應該好肥仔。好保守計數，集團09年度純利，只係係咁意增長15%到2.5億銀，預期PE都係得5倍單位數。喺一個極具增長潛力嘅行業同地區睇，呢個PE水位，平得交關。勤+緣現價（1.84元）翻半番到2.76元，預期PE7.5倍，實情仲有大把上升空間。

　

世城短炒博3成回報

世紀城市（355）07年4月高位4.65元，兩年跌咗91%，齋計1年累積跌幅，都講緊70%，現價0.39元，挨近沙士價，真係好殘。又世城連埋酒店資產重估，最新NAV1.69元，現價折讓高達77%，折讓誇張到流晒口水。對上星期尾，落後磚頭股好似世城系內百利保（617）、遠展（035）及莊士孖寶，都有唔錯升幅，資金追捧大折讓股仔，世城啱路數。呢轉短打，博世城NAV折讓收窄到70%，潛在回報率30%，有魚有肉。
錢雋