黑社會「埋尾」，以和為貴不成，比上集血腥暴力。這個當然咯，黑社會邊係幾個臭飛金毛強迫任達華飾演的話事人的兒子落叠那樣說：「到時大把女溝、大把錢使。」一入火坑，話之你黑皮白心抑或相反，總之身不由己，連未出世的孩子，也注定要吃黑這口飯，無得翻身的悲情，Jimmy仔最入骨入肉，就算力竭聲嘶想洗底唔做蠱惑仔，也要上頭大佬首肯。人在這個中港夾縫的江湖，就算做到話事人，一樣要聽天由命，北望神州，睇阿公食飯。
黑社會拼命向上爬，辦掙錢的企業，夥拍商家，朝祖國進軍。義氣冇時間講，龍頭棍搶來搶去得個桔，最終有沒有棍在手，話事權也不在大佬，一切要跟中央配合。「這是國家政策」，公安副廳長語重心長表白，行蠱惑出身的，都聽得明白。香港好，祖國好，香港黑社會抓得銀多，內地公安賺得更多，一家便宜兩家着，難怪合作愉快，唔想江湖興風作浪，打打殺殺，搵銀紙來陪葬，嫌錢腥咩？

香港在祖國眼中，一個字頭咁簡單，至緊要搵錢，選舉搞來多餘，連八百隻右手也懶得舉，一挨欽點，話事人就得鞠躬盡瘁，死而後已。Jimmy想搵夠收籌，撇甩黑底，做上等生意佬的如意算盤打不響。上頭下令你繼續做，世世代代靠黑邊站。「和聯勝就是你姓李的了。」Jimmy不是姓黎，姓李，李家天下，能一直以和為貴下去麼？假如拍第三集，Jimmy三仔爺肯定做了上市公司主席，成功越界操控政經兩瓣，呼風喚雨。而我們不懷疑，杜琪峯跟很多市民一樣，是捱貴電的港燈用戶！