伯明翰球隊來季降班，班主兼伯明翰（2309）主席楊家誠又涉嫌洗黑錢，除咗傷盡球迷同股民心，傷心嘅仲有一個，就係舊年開始贊助伯明翰5年嘅特步國際（1368）。華華同特步主席丁水波講起，佢都忍唔住爆咗句，「真係見鬼！」
丁總有啲激動咁話，雖則你知我知大家都知「波係圓嘅」，但勢估唔到隊波一時可以好到拎冠軍，一時又會搞到家咁。激還激，但佢話整體嚟講合作算成功，起碼特步係第一個內地運動品牌進軍英超。
最近，特步又贊助咗支西甲勁旅──「黃色潛水艇」維拉利爾，5年盛惠450萬歐元，差唔多5000萬港紙，足足平伯明翰一半。