岑麗香近日回巢拍劇，受疫情影響一直拍攝廠景未有外出，今日她現身金鐘出席近期鮮有的公開活動，為護膚品牌宣傳。大會早有準備，所有入場人士都要經過量度體溫後搓手消毒才能進場，今日活動亦刻意減短時間，減低人群聚集風險。

已為人母的香香防疫意識很強，活動後即戴上口罩，小心翼翼首先清潔雙手，再用消毒紙巾將訪問咪消毒才受訪，以防萬一十分安全。近日無綫新增懷疑個案，香香個別接受無綫訪問時，亦同樣刻意將咪消毒，並與主持人保持距離，以策安全。

香香透露今日出席活動做足安全措施，儀式後立刻戴上口罩，她曾經考慮缺席活動，但因疫情前已答應，幸得到各方面體諒做足準備才現身，簡短儀式過後即接受訪問。近日她在大台開拍新劇，屢傳出疑似個案，她說：「拍劇上年已經定落，開劇時化妝間同廠都會盡量消毒，大家都配合想有好嘅環境之下工作，盡力做足預防措施。」近日配合劇組只一日開一組戲，工作時間較過往短。

香香每日放工後都不敢鬆懈，會全身消毒將鞋放門口，衣服經過蒸氣處理，妥當後才敢探頭入房睇BB，她無奈說：「雖然講出嚟有啲誇張，但呢個情況都要做。」囝囝Jacob日前1歲生日，只低調和屋企人食飯慶祝，香香送了份回憶給愛子，她說：「整咗一個cake smash（扑碎蛋糕）儀式，囝囝第一個生日蛋糕，未食過咁好食嘅嘢，可以畀佢用手拍打玩，搞到污糟邋遢但好開心，影低咗啲相同片段，第日係一個好好回憶留念。」

採訪：卓寶花
攝影：陳慧安

-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》