八方有時見到啲好工，都會同大家分享，畀多啲發達機會大家；但今次要推介嘅工就真係純‧分享，因為未必啱大家心水！

左報《文匯報》喺網上出咗招聘廣告，聘請多個職位人士，有網絡編輯、播音員、美術編輯等，呢啲都好正常，但有一個叫做「輿情監測員」職位，單聽個名已經夠勁，睇返呢個職位做啲乜？犀利喇，包括收集、分析、跟進、輸出網絡輿情，「輸出」輿情？之唔係就做打手！而且應徵者仲要「熟悉網絡危機處理流程和應對方式」，又啱數嘅，咁將來乜乜議員私通特首、某某人大帶Gel上機，同埋見慣不怪嘅僭建、假學歷等事件又再發生，的確要識得處理。

要求方面，大學學歷就梗㗎啦，仲要對香港政治生態有一定了解，熟悉香港網媒平台同埋粵語流利，呢啲都啱數，因為今時今日做五毛，都始終不能太五毛，要似番個香港人。之但係工作地點，竟然係深圳喎。吓，喺深圳點上fb、Ig呢？定啲嚟，使乜驚啫，而家國家有任務畀你，攞正牌翻牆呀，明未？