初戀忐忑嘅感覺，令人刻骨銘心，一生得一次，第一次去付出真心去對待一個人，當然會好記得!

梁詠琪、陳曉東、馮德倫及鄒凱光等，廿年前拍經典愛情片《初戀無限Touch》，東東同GiGi今午上《蘋果》娛樂直播節目《今日ENT》，講番自己近況同當年拍劇嘅點滴。東東係9月3日生日，GiGi提早同佢慶祝，東東希望大家繼續唱多啲新歌。

之前GiGi喺上海個唱，搵咗東東做嘉賓，不過今次就有機會坐埋一齊傾耐啲，佢哋覺得大家成長咗好多，講番當年嘅感覺，東東話；「我成日都會諗起，呢套戲當年拍初戀戲，我拍好enjoy，當時年紀細，拍初戀戲會易啲代入，反而演其他角色經驗少。」GiGi指當時自己仲係新人，出道冇耐，19、20歲入行。

講起廿年後，GiGi覺得大家都有唔同，生活改變咗，大家都升級成為爸爸媽咪，諗番初戀好似好遠之前嘅事咁，問到佢哋拍續集會唔會再有「初戀」呢個字，GiGi即拒絕：「仲初戀，唔係啩!」

入行以嚟，一直有人覺得東東同GiGi生得似樣，GiGi望咗東東一眼，就話：「男仔嚟講，東東都算眼大，可能我屬於女生男相，又一直係短髮。」東東就覺得佢哋拍埋其實唔似樣，可能係五官比例差唔多，個面嘅比例集中，所以睇起上嚟先似。