前無綫助理編導「偽文豪」現真身接受本報訪問，直插無綫如何刻薄寡恩(相關新聞: http://bit.ly/1iCl3Qw )，咁啱噚晚《東張西望》進行「消毒工程」，請來行政主席梁乃鵬、助理總經理區偉林、金牌監製李添勝，仲有喺無綫做咗4年PA嘅林肯，以及由PA升監製嘅陳耀全等等現身說法，大談喺無綫做PA是如何有前途有希望而且獲公司重要。

當中就連堂堂助理總經理區偉林，都喺節目中爆咗句初初切入無綫時「做PA係我夢想嚟0架！」(相關新聞: http://bit.ly/1jxtxui )，委實令人「感動」。「偽文豪」唔知有冇睇，但佢喺FB寫咗句:「我聽人講，今日<東張西望>幫我本書造勢喎，係唔係有啲咁嘅事？所以話世上只有TVB好~~~」

都話世上只有TVB好，不少網民都有去「偽文豪」FB留言，留言：「有人同你做免費宣傳，廣告費都慳番~~!!」當中包括自稱係前無綫員工嘅網民，有人留言話:「N年前我都撈過丅BB呻吟部，見親啲同事都鞋鞋聲，一返工就有人請食散水雪條，心都寒。每個星期都派本丅BB周刊，我心諗一年都有52本都頂到啩，结果我拿左12本冇再拿了，真係巧難頂。」咁灰？

該網民之後再話:「好多方丈為你打氣，但通通都好小器。」佢仲寫咗個更加好笑嘅經歷:「最好笑嗰陣喺丅BB撞返個做『勁柯金曲』個失散Friend，第一句問：『咩你落咗嚟呀！』兩條友陰間相逢咁，真係斷六親。偽文豪兄，傷心不只是你一個，還有很多很多好很多創傷性故事。加油吧！」

亦有另一位自稱都係前無綫員工留言話:「作為前TVB寫稿，東張西望呢啲維穩節目真係算X數啦。雖然冇睇過你本書，但我好明白當中究竟有幾多仆街嘢。自己經歷過嘅、聽過嘅都唔少。只可以講，如果好鍾意做幕後，千祈唔好入TVB。」仲講到話會捱到「打橫出返嚟」。偽文豪問佢:「我可唔可以放大你呢段再分享比大家睇？」對方話:「寫得出嚟預咗有人見到(包括TVB啲人)，偽文豪兄隨便用！」

除咗上述兩位，仲有其他自稱無綫員工留言，如:「我做了10幾年！見證咗你們的辛苦！人工低、冇OT(錢)、還要帶阿媽返工！我應該會買來睇支持你！」、「我比佢裁員、再請番，甚麼勞工法也保障唔到你們！」、「做咗年多PA.....同感，同時間處理100多樣嘢，食X麵，被進擊，但我好好多，我呢組就算進擊完你，都會呵番你，細心解釋，期待你的書……」

有負評，但都有正評，有人留言:「我係都同係同年做PA，不過唔同組，但係好想講句，唔好咁唔公平，TVB係有福利既，只係你做得7個月，仲係contract，做夠1年表現好，可轉perm，就算contract都有醫療啦!」也有人謂:「死啦我聽日仲去inTVB實習＝＝」偽文豪就回佢:「努力做好自己，就會搵到出路~~唔使擔心嘅~」