【都是那些年】「陸家俊我哋支持你．．．」90年代被踢出局的陸家俊，多得軟硬的金曲《廣播道Fans殺人事件》，才令他人已out，名未out，廿年人事幾番新，當年15歲，只得120磅的仔，現在已是37歲，一度是230幾磅的大肥佬，死心不息重新殺入娛樂圈搞公司培訓新人。　撰文：山葵

提起陸家俊，就會想起蔡興麟，兩位同屬90年新人，外形相似，星運亦一樣，但際遇卻不同。家俊15歲，唸中三時參加華星新秀歌唱比賽，被當年評判之一，樂壇大姐大梅艷芳公開點名讚睇好，不過焦點愈多，壓力愈大，家俊在比賽中只獲亞軍，短暫四年星途，只出過一張唱片，蔡興麟亦同告淡出。

拍MV受傷萌退意

士別18年，眼前的陸家俊變成160磅白白淨、凸出小肚腩的生意佬，他笑口噬噬說：「之前見我，仲肥呀，230幾磅，坐喺度唞唔到氣，行路又腳痛，上年中決定地獄式減肥，每日只食８粒白魚蛋及菜，連續食兩個月，成功減咗60磅，不過大家唔好學我，好傷身，之後要睇中醫補身。」
18歲那年，陸家俊在貨櫃碼頭拍新歌《龍吐珠》MV發生意外，由貨櫃失足墮地受傷，在醫院躺了幾個星期，這樣一跌，他決定退出娛樂圈，94年正式離開Sonymusic，到美國波士頓唸樂理，他說：「嗰時感覺怪怪地，覺得好危險，喺美國讀咗四年書，98年返嚟香港，拍咗一陣TVB劇，又做咗一陣模特兒，嗰時真係死心喇。」

難忘梅姐張國榮

陸家俊說正式決定放手時，沒有不甘心，反而清楚知道：「人生就好似蝴蝶效應，揀乜嘢，就出乜嘢，離開時，個心好平靜。」他感謝當年梅姐點名欣賞他，他不覺得壓力來自阿梅的讚賞，他檢討過自己衰乜嘢：「92年四大天王開始冒起，我嗰年有20個新人，我哋仲要同張衞健嗰首《真真假假》爭，四大天王個個靚仔又有才華，我就成個死仔，戇居居咁，衰在年紀太細。」
離開娛樂圈後，陸家俊做過不少生意，幫過屋企的金融生意、飲食業、地產界都做過，亦曾與美國同學仔搞過一間音樂製作公司，他最開心能參予梅姐和張國榮合唱的《芳華絕代》製作工作，他說：「係上天安排我報答梅姐，多謝呢張碟監製蔡一智搵我，畀咗個機會我報答梅姐，嗰時梅姐同張國榮一齊嚟錄音，兩位天王巨星，sharp到不得了，真正嘅舞台皇者就係咁樣，不過嗰次已經係最後一次見梅姐。」
陸家俊始終對娛樂圈死心不息，最近回歸娛樂圈大展拳腳，搞紅日娛樂公司，培訓藝人，提供跳舞、音樂、戲劇和禮儀班訓練，他坦白承認：「你可以話我念念不忘娛樂圈，我睇好娛樂圈前景，尤其係大陸。」
重返娛樂圈，陸家俊自嘲老了很多，他說：「好多人都話我個樣變咗，家似呂良偉加黃耀明，但呂良偉喺我咁嘅年紀時，型到不得了，相比37歲嘅呂哥，我失敗好多，明哥年紀大過我，但瀟灑倜儻又靚仔，我更加慚愧，冇得比。」

自豪名字唱通街

自悲之中，陸家俊也有自豪時候，許多年來，他出街時還有fans認得他，他說要多謝軟硬、少爺占，與及商台DJ陳強。軟硬當年唱通街，與及每次開演唱會必唱的《廣播道Fans殺人事件》歌詞有唱他的名字；ILoveyouBoyz的少爺占在商台廣播劇中名字又叫「陸家俊」；前商台DJ陳強，原名跟他同名同姓叫「陸家俊」，一個普通名字，卻成為幕前的最愛。
陸家俊雀躍地說：「所以陸家俊好似從來冇離開過娛樂圈，聽聞少爺占嘅廣播劇遲啲又再播，『陸家俊』又再喺廣播劇出現。」而原裝陸家俊，亦宣佈全面回歸。
場地提供：頂好海鮮酒家