呢個群組噚日先至開張，已經野生捕獲咗好多空置樓。呢啲空宅並唔係「凶」宅，部份係發展商收樓後丟空。例如10年前已經開始收樓嘅西環大廈、炮台山木星街舊樓群等等。最詭異嘅莫過於新界東北20幾幢3層高「鬼屋」，起好丟空近10年，唔知道仲以為係大陸啲爛尾樓。
費清問過群組發起人Camille，佢話政府統計全港私樓空置率只係得4.1%，所以政府認為唔駛討論點處理空置房屋。不過佢話政府只係巡查全港3%私樓單位去計算空置率，近年仲要冇巡村屋，所以呢個數未必反映到實況。加上唔少人平時又發現有好多空置單位，於是搞呢個群組，呼籲一眾網民幫手影低長期冇人住嘅私樓，一齊解構吓空宅之謎。