講起北韓，第一樣諗起嘅當然係最高領導金正恩。其實金仔早年都同前NBA球星洛文（Dennis Rodman）做過朋友，洛文更試過喺2014年大玩「籃球外交」，帶埋尼安達臣（Kenny Anderson）、比加（Vin Baker）、奇里福羅賓遜（Cliff Robinson）等另外六名退役NBA球員，以及四名街頭籃球好手，去平壤同北韓國家隊友賽，兼為金仔慶祝31歲生日。

不過，洛文呢次北韓之旅受盡美國傳媒口誅筆伐，指佢為獨裁者塗脂抹粉。而洛文事後發火爆粗反擊，惹來更多批評，就連隊友都話上錯賊船，令「籃球外交」變成鬧劇。