喺1980年仲做緊記者嘅民主黨主席劉慧卿，當年身穿吊帶裙出鏡報新聞一幕成為經典。講咗好耐話會着番條吊帶裙畀大家重溫嘅佢，終於喺噚日交出時間表路線圖，承諾今年卸任立法會議員前一定會再穿呢條一直放喺衣櫃嘅吊帶裙。會唔會攞呢條裙出嚟拍賣幫補民主黨？卿姐笑謂：「36年前嘅裙邊會值錢呢？我又唔係瑪麗蓮夢露。」

36年來衣櫃珍藏

卿姐噚日最後一次以議員身份同傳媒喺立法會新春茶敍。向來唔興離愁別緒嘅卿姐，相當有興致講起月底黨慶晚宴點樣籌款，提及唔少人叫過佢再着當年條吊帶裙籌款，仲話最好着住嚟同人辯論，但佢話月底天氣仍冷，絕對唔會咁做，但承諾卸任前一定會再着，一係喺立法會最後一日着，一係就喺由佢助理、義工搞嘅惜別宴encore，總之唔會走數，大家拭目以待，佢仲向一眾記者挑戰，話邊個可以將30幾年前嘅衫再着上身？又確實，唔只身材，少啲勇氣都未必做到㗎！
咁喺黨慶唱番支歌仔娛賓，都少不免啩？卿姐話，要佢開金口，起標價要15萬，仲透露港鐵主席馬時亨答應捐款畀民主黨。至於屆時有乜嘢拍賣？卿姐話唔好攞啲貴嘢出嚟賣喎，「普普通通，十零廿萬嗰啲囉！」

李八方

mailto:[email protected]