再有地區小型工程建設惹爭議，一幅位於鰂魚涌天橋底、花費54萬元嘅行人天橋底矮石牆，因連日大雨注水變成「金魚缸」，不單俾巿民投訴毫無用處，仲有惹蚊患嘅嫌疑，結果招來大量網民留言揶揄，令人哭笑不得。

民政事務總署每年撥款近5億元喺全港18區推行小型工程計劃，款項由區議會審批，但實際效用成疑，fb群組「樂活鰂魚涌」近日有人貼文，指鰂魚涌英皇道行人天橋底，2015年中進行美化工程，由天橋底原本放置花槽改為建設9幅矮石牆同凳仔座椅，原意係增加休憩同綠化帶，但近日連場大雨，石牆中間為扇形膠幕中空設計，雨水有入無出，結果變成「金魚缸」，加上日曬雨淋，水底湧現青苔，水質呈墨綠色。

上載者指呢個工程由區議會批核，由40萬元估價，完工後埋單要54萬元，直斥浪費公帑。有網民睇完後積極發言，有啲就揶揄「唔漏水喎！好過沙中綫呀！」有啲就開玩笑話：「度雨量㗎，識咩吖你哋！」亦有網民認為呢個「養蚊」設計根本似「垃圾崗」多於美化，唔知大家又點睇？

你敢爆，我敢獎！ 即Call《蘋果》24小時爆相爆片熱線 ：63836568