2000年代盛產混血女模，轉下眼，原來佢哋已經過咗3字頭，踏入人生另一階段。好似貝安琪咁，年初就同男友Simon生咗囝囝Sebastian，咁同期嘅混血女模，又去咗邊呢？

Lisa S.同型男吳彥祖於10年結婚，囡囡Raven已經4歲大，Lisa好多時候都喺美國湊女，久唔久返香港同朋友見下面。早前就俾《蘋果》見到佢同陳嘉容喺老銅食lunch，臨走都仲雞啄唔斷傾足10分鐘先走。

樂基兒喺12年同黎明結束4年婚姻，不過佢前年多次被影到同生意才俊Ian Chu拍拖。早前樂基兒仲向《蘋果》親證，Ian求婚，8月會喺加州拉埋天窗，但暫時未打算生仔。

Amanda S.都曾經同意大利籍丈夫結婚，不過喺14年離婚，無耐仲賣出甜品店服份，回到原點。不過感情重新出發，就遇到現任男友Sam，對於再婚，Amanda就小心翼翼。

「翻版關之琳」Danielle Graham 亦都結過婚，可惜上年同結婚七年嘅丈夫離婚，要獨力照顧一對子女。 Danielle回復單身，由名模變做煮飯婆，出書教煮餸。