英超領先 市況轉好
中環在線：曼聯上市風又吹 - 李華華
蘋果日報 2012/04/15 00:00
英超季尾各隊盡全力作最後衝刺，紅魔鬼曼聯當然為咗第13次英超冠軍、同第20個頂級聯賽錦標進發，班霸踢波唔輸得，集資嘅步伐又點能夠落後於人？《星期日泰晤士報》噚日話，鑑於近排市況好番啲，曼聯班主格拉沙家族有意喺新加坡重新啟動上市程序，希望喺8月之前能夠掛牌，預料集資6億英鎊。
舊年曼聯贏了英超，上市就搞搞吓冇影。今年格拉沙家族又重提新加坡上市。
集資74億港元
紅魔鬼喺亞洲一直有好多擁躉，喺亞洲上市當然引來星港兩地交易所垂涎，舊年中就傳出新加坡交易所橫刀奪曼聯，畀佢哋以A、B方式限制股東投票權嘅結構上市。不過跟住歐債問題接踵而來，鑑於集資規模龐大，為咗避免招股隨時撻Q，格拉沙家族被迫喺風高浪急嘅市況下煞停。
今次捲土重來，曼聯諗住發售25至30%股權，集資6億英鎊（約74億港元），比舊年9月提出嘅78億港紙少咗啲啲，預計球會市值就達到20億英鎊（約246億港元）。家紅魔喺英超領先兩分（未計周日賽果），錦標在望，如果今次成功上市，就真係雙喜臨門。
曼聯喺領隊費格遜帶領下，成為英超歷來最成功嘅球會，不過球會財政狀況就一般，就算曼聯今次能夠成功上市，最心痛可算係紅魔球迷，因為擔心曼聯再一次淪為格拉沙家族嘅㩒錢機器。
李華華
mailto:[email protected]
今次捲土重來，曼聯諗住發售25至30%股權，集資6億英鎊（約74億港元），比舊年9月提出嘅78億港紙少咗啲啲，預計球會市值就達到20億英鎊（約246億港元）。家紅魔喺英超領先兩分（未計周日賽果），錦標在望，如果今次成功上市，就真係雙喜臨門。
曼聯喺領隊費格遜帶領下，成為英超歷來最成功嘅球會，不過球會財政狀況就一般，就算曼聯今次能夠成功上市，最心痛可算係紅魔球迷，因為擔心曼聯再一次淪為格拉沙家族嘅㩒錢機器。
李華華
mailto:[email protected]
有球迷已經急不及待訂購呢款「20錦標」tee。