昨日升幅榜股份當中，有兩隻都是剛公佈業績股，其中中國利郎（1234）周二高位急回之後，昨日幾乎升回上市以來高位，股價單日急升9%。利郎業績勁爆，股價卻是先升後急跌，市場似乎是反應過敏，認為好消息一定出貨，但睇真啲份業績，增長的確強勁，加上管理層解畫表示會做好品牌，投資者受落股價自然回升。
同樣情況發生在物美商業（8277）身上，公佈佳績後被無厘頭質低，昨日又升回所有跌幅。

羅欣增長強勁

半冷門醫藥股羅欣藥業（8058）亦公佈業績，正如之前兩年業績，維持強勁增長，去年度營業額急升35.9%至9.07億元，純利更勁全年增長46.6%賺2.69億元。一隻純利每年保持三四成增幅的股票，年賺兩億多元，無理由仍在創業板交易，一旦轉主板，其高增長必定受傳統基金注意，趁未轉板，現價仍是非常吸引。
未來一段時間仍有多隻股份即將公佈業績，有機會好似羅欣單日急升9%的股份，其中一隻是雨潤食品（1068），該公司中期實現利潤已急升36.9%，盈利仍處於高增長階段，預測PE只係22倍，其股價在過去兩星期回落過後，又回到較吸引水平，暫時未使怕好業績出貨，除非下星期一公佈業績前已經炒到破頂，否則現位買仍有唔錯上升空間，偷步買好過出咗業績至高追。
歐陽風