恒指噚日繼續同牛熊線周旋，埋單微跌8點，不過連續兩日企穩21000點水平，叫做有啲誠意。早兩日推介嘅光大國際（257）正式開車，彈升5.3%之餘，成交亦配合，相信衝穿上月高位3.45元，只係時間問題。
人民銀行表明內銀要滿足首套房信貸需求，內房交投有望再度活躍，在內地超過20個省市有據點嘅代理商合富輝煌（733），值得憧憬。截至去年6月底止，合富半年賺7553.5萬銀，按年增長27%，悲觀假設下半年盈利只及上半年25%，全年預測盈利為9441.9萬元，PE都未夠9倍，作為唯一在本港上市嘅內地代理商，更易獲資金垂青，情況就如香港嘅美聯（1200）。合富噚日收報1.83元，升10.9%，成交激增6倍，動力十足，戰友可候1.8元水平上車，首個目標為去年跌浪反彈0.236倍（2元），倘市況配合，衝上2.5元（反彈0.382倍）也非難事。
唐牛