噚日滙豐公布業績，盈利增長完全超越晒所有分析員預測。相信各大行嘅分析員對獅子錢莊嘅盈利預測傾向保守，主要因為自從2003年收購美國財務公司HouseholdInternational之後，市場普遍對滙豐透過正常增長嘅能力有懷疑，亦再唔會有以往嗰種爆炸力，結果事實證明世界仲有好多有潛力嘅市場係可以慢慢發展，要增長唔一定要靠收購。
𠵱家滙豐亞洲及南美業務加起都只不過係整體稅前盈利15.4%，大家可以試吓幻想，如果滙豐可以將其他新興市場嘅業務搞起，仲要做到好似香港咁有聲有色，要維持過往嘅增長率並唔係難事。最重要一點，就係呢啲市場本身都已經係高增長，所以只要世界和平無驚無險，滙豐呢個「環球金融．地方智慧」嘅策略絕對可以用上十年八載。
香港係國際金融中心，但始終係一個非常成熟嘅市場，呢一點對唔同嘅人嚟講有唔同嘅意義。對滙豐呢啲環球大機構，香港只不過係一個穩定嘅收入來源，所以亦冇必要響呢度大量投資人才。