最近是非多多嘅黎燕珊，今日仲有報道話宮雪花踢爆佢為人霸道，同羅霖面和心不和已久。咁啱今日黎燕珊要去中環試戴珠寶，講到同羅霖傳不和，佢話要用心力交瘁去形容：「估唔到自己人都有咁多問題發生，總之公道自在人心，呢件事對會嘅形象一定有影響，我都唔想講咁多，由得人哋點講，只要佢開心就得。」

黎燕珊話仁美清敘秘書因為是非而提出請辭，經佢游說後最終肯留低。至於黎燕珊本人會唔會請辭會長一職(羅霖係主席)，佢話呢個係責任，任期仲有年幾先完，會努力完成。