【韓流】金太勳涉性侵發聲明反駁 攝影師Rotta捲性騷擾風波
Rotta金太勳
韓國演藝圈近日爆出多宗性醜聞,噚日再有報道指兩男星涉案,包括韓劇《爸爸好奇怪》、《師任堂,光的日記》嘅64歲男星崔用閔及韓片《鳴梁》嘅42歲男星金太勳,崔用閔已立即道歉。
金太勳被一名女網民實名指控遭其性侵,金太勳更要求持續雙方有性關係,不過因為女網民太驚,所以唔敢有所行動,金太勳沉默咗一日,直至噚晚先發聲明向疑似受害人道歉,並稱會負上責任以及正深深反省中,金太勳又指會就事件向世宗大學辭退教授一職,並中斷演藝工作。不過金太勳就指報道嘅內容與其記憶有所出入,金太勳主張自己於2000年曾與該名女網民拍拖,但兩人翌年分手。
另外,著名攝影師Rotta(崔原錫)噚日亦被爆涉性騷擾,Rotta之前曾與Sulli、具荷拉等人合作影相,喺業內頗有人氣,但其作品因係lolita風格曾被批評鼓吹孌童而一度引起爭議。
MBC電視台噚晚播出疑似受Rotta性騷擾受害人嘅訪問,受害人表示:「5年前我仲係大學生,當時從事模特兒工作,Rotta主動聯絡我,因為Rotta都好有名氣,所以我覺得好開心。點知一開始拍攝時,Rotta就開始非常露骨嘅性騷擾,突然問我要唔要咬佢嘅手指,然後又不停摸我。」受害人最後驚到離開,但Rotta就傳短訊畀受害人,表示「我咁做只係因為你太靚,我先忍唔住」。
受害人又指Rotta以佢之前影嘅全裸照作威脅,但據受害人透露,佢跟Rotta協議時表示僅以膊頭位置出鏡,而Rotta又唔肯刪相令佢大感委屈,決定揭發Rotta嘅惡行。不過Rotta僅表示拍攝過程中已征求模特兒嘅同意,當時並冇提出任何問題,否認性騷擾嘅嫌疑。
更多韓流,喺晒《娛果》
http://fb.com/appledailyent
有疑似受害人受訪指曾遭攝影師「Rotta」崔原錫性騷擾
Sulli呢輯引起爭議嘅相亦係由Rotta操刀拍攝
Rotta作品以lolita風格為人熟悉,曾被批評鼓吹孌童,多次引起爭議